இதயத்துள் நுழைந்தவன்

இடுக்கண் களையவும்
இருப்பதைப் பகிரவும்
இதயத்துள்
நுழைந்தவன் - நீ!

இளமை சிறக்கவும்
இனிதாய்த் திகழவும்
இன்முகம் கொண்டவுன் -நீ!



வணிகம் கற்கச் சென்று
மனிதம் கற்பித்தவன்,
மனிதர்கள் மத்தியில்
புனிதம் போதிப்பவன்!

அந்த ஒரு நாள்
விடிந்திரா விடில்

அறிமுகம் என நீ
வந்திரா விடில்...

கால்பந்து மைதானமும்
கணினி மொழி வகுப்பும்
புதுக் கல்லூரி விடுதியும்
புல் விரித்தத் திடலும்

தற்கால நினைப்பில்
கண்றாவியாய்த் தோன்றும்
கடைக்கண் பார்வைகளும்
காதலிகள் கிறக்கமும்

உப்பளக் காற்றும்
உமுரிச்செடி பிரித்த
ஒற்றையடிப் பாதையும்

இரவின் துவக்கத்தில்
கிளம்பும் ரயில்
அதிகாலை அதிரையை
அடையும் அழகும்

ஒற்றையாய் எனக்கு
வாய்த்திருக்காது நண்பா!
எத்தனையோ எண்ணங்கள்
எழுதி முடித்தபோதும்
உனக்கென துவங்கியதை
முடிக்க மனம் ஒப்பாது!

வயிற்றுக்குப் பசித்தால்
வாய்தானே உண்ணும்?
உடலை நகர்த்த
கால்தானே நடக்கும்?

என்னை உயர்த்தவன்றோ
உன்னில் நினைத்தாய்
உன்றன் துஆவில்நான்
உலகை வென்றேன்!

நட்பின் வலிமையை
நாலுபேருக்குச் சொல்ல
நானோ நீயோ
உன்னையோ என்னையோ
ஈன்றெடுக்க வேண்டும்...
நட்பும் தாய்மையும்
ஒத்த உணர்வுகள் என
நின்றுரைக்க வேண்டும்!

- 'இளங்கவி' சபீர்